දිවයින පුරා පවතින ආපදා තත්ත්වය හේතුවෙන් බාධාවට ලක්වී ඇති දුරකථන සහ අන්තර්ජාල සන්නිවේදන ජාල කඩිනමින් යථා තත්ත්වයට පත් කිරීම සඳහා ගත යුතු විශේෂ ක්‍රියාමාර්ග පිළිබඳ රජය සහ ප්‍රධාන පෙළේ විදුලි සංදේශ සමාගම් අතර සාකච්ඡාවක් අද (29) පවත්වා තිබෙනවා.

ඒ විදුලි සංදේශ නියාමන කොමිෂන් සභාවේදීයි.
 
ජනාධිපති ලේකම් කාර්යාලය, 'ක්ලීන් ශ්‍රී ලංකා' ලේකම් කාර්යාලය, ඩිජිටල් අමාත්‍යාංශය සහ විදුලි සංදේශ නියාමන කොමිෂන් සභාව ඒකාබද්ධව මෙම සාකච්ඡාව සංවිධානය කර තිබෙනවා. 

පවතින අධික වර්ෂාවත් සමඟ ඇති වී තිබෙන ආපදා තත්ත්වය හේතුවෙන් සම්ප්‍රේෂණ කුළුණු සඳහා විදුලිය ඇනහිටීම් සහ ජාල බිඳවැටීම් නිසා ජනතාවට සිය ඥාතීන් සම්බන්ධ කර ගැනීමට නොහැකි වීම පිළිබඳව මෙහිදී සාකච්ඡා කර තිබෙනවා.

ඒ අනුව විදුලිය ඇනහිට ඇති කුළුණු සඳහා කඩිනමින් ජනන යන්ත්‍ර හෝ විකල්ප බලශක්ති සැපයීමට අදාළ සමාගම් සහ විදුලිබල මණ්ඩලය අතර සෘජු සම්බන්ධීකරණයක් ඇති කිරීමටත්, හානියට පත් වූ කුළුණු අලුත්වැඩියා කිරීමට අවශ්‍ය තාක්ෂණික කණ්ඩායම් ආපදා ප්‍රදේශවලට යැවීමට රජයේ ප්‍රවාහන සහ ආරක්ෂක අංශවල සහාය ලබාදීමටත් මෙහිදී තීරණය කර තිබෙනවා.   

(colombotimes.lk)