ගම්පහ දිස්ත්‍රික්කයේ අත්තනගලු ඔය ජල මට්ටම තවදුරටත් ඉහළ යමින් පවතින බව වාරිමාර්ග දෙපාර්තමේන්තුව පවසනවා. 

එහි අධ්‍යක්ෂ ඉංජිනේරු එල්. ඒ. සූරියබණ්ඩාර සඳහන් කළේ ඊයේ (28) දිනය තුළ එම ප්‍රදේශයට මි.මී 300කට අධික වර්ෂාපතනයක් ලූනමලෙයි ප්‍රදේශයේ ඉහළ ප්‍රදේශවලට ලැබුණ බවයි. 

මේ වන විට දූනමලෙයි ජල මිනුම් මධ්‍යස්ථානය උපරිම ස්ථානයට පැමිණ ඇති අතර එම ස්ථානයත් යට වී තිබෙන බවටද තොරතුරු වාර්තා වනවා. 

වාරිමාර්ග දෙපාර්තමේන්තුවේ අධ්‍යක්ෂ ඉංජිනේරු එල්. ඒ. සූරියබණ්ඩාර සඳහන් කළේ මේ හේතුවෙන් ගම්පහ දිස්ත්‍රික්කයේ පහළ ප්‍රදේශය හා ගම්පහ නගරය මෙන්ම වත්තල, ජාඇල වැනි ප්‍රදේශ ජලයෙන් යටවී තිබෙන බවයි. 

ඉදිරි පැය 24 සඳහා අධි අවදානම් ගංවතුර ඇඟවීමක් මහ ඔය ද්‍රෝණිය සඳහා නිකුත් කර ඇති අතර මේ හේතුවෙන් ගිරිඋල්ල සහ බඩල්ගම මිනුම් මධ්‍යස්ථානවලට අති දැවැන්ත ජල මට්ටමකට ළඟා වී තිබෙන බවද වාරිමාර්ග දෙපර්තනේතුව සඳහන් කළා. 

එම දෙපාර්තමේන්තුව වැඩිදුරටත් සඳහන් කළේ දිවුලපිටිය, අලව්ව, කටාන, මීරිගම, දංකොටුව, පන්නල, නාරම්මල, මීගමුව හා වෙන්නප්පු යන ප්‍රදේශවල පහත්බිම් යටවීමේ අවදානමක් පවතින බවයි. 

ගංඟා ද්‍රෝණි කිහිපයක මේ වන විට බරපතළ ගංවතුර තත්ත්වයක් පවතින හෙයින් අදාළ ස්ථාන වලින් වහාම ඉවත් වන ලෙස වාරිමාර්ග දෙපාර්තමේන්තුව ජනතාවගෙන් ඉල්ලා සිටිනවා.

(colombotimes.lk)