රජයේ රෝහල් සඳහා අවශ්‍ය ශල්‍ය ගෝස් නිත්‍ය සලාක ක්‍රමයක් යටතේ දේශීය නිෂ්පාදකයන්ගෙන් මිල දී ගැනීමට තීරණය කර තිබෙනවා.

ඒ දේශීය සුළු පරිමාණ නිෂ්පාදකයන් නගා සිටුවීමේ රජයේ ප්‍රතිපත්තිය මත පදනම්වයි.

2025 වසර සඳහා වෛද්‍ය සැපයීම් අංශය වෙත ශල්‍ය ගෝස් අවශ්‍යතාව මීටර් මිලියන 30ක් ලෙස ඇස්තමේන්තු කර තිබෙනවා.

ඒ අනුව ශල්‍ය ගෝස් සලාක නිර්ණය කිරීමේ කමිටුව විසින් ලියාපදිංචි දේශීය නිෂ්පාදකයන් 282දෙනෙක්ගෙන් 2025 වසර සඳහා ශල්‍ය ගෝස් මීටර් මිලියන 30ක් මිල දී ගැනීම නිර්දේශ කර ඇති බවයි වාර්තා වන්නේ.

එලෙස මිලදී ගන්නා ශල්‍ය ගෝස් මීටරයක ස්ථාවර මිල ශ්‍රී ලංකා රුපියල් 68.97ක් ලෙස මිල කමිටුව විසින් අනුමත කර තිබෙනවා.

ඒ අනුව ශල්‍ය ගෝස් මීටර් මිලියන 30ක් එම ස්ථාවර මිල යටතේ වෛද්‍ය සැපයීම් අංශයේ ලියාපදිංචි දේශීය නිෂ්පාදකයන් 282දෙනෙක්ගෙන් මිල දී ගැනීම වෙනුවෙන් සෞඛ්‍ය සහ ජනමාධ්‍ය අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කර ඇති බවයි වාර්තා වන්නේ.

(colombotimes.lk)