ජනාධිපති අනුර කුමාර දිසානායකගේ ආරාධනයකට අනුව තෙදින රාජ්‍ය සංචාරයක් සඳහා ඉන්දීය අග්‍රාමාත්‍ය නරේන්ද්‍ර මෝදි අද (04) ශ්‍රී ලංකාවට පැමිණීමට නියමිතව තිබෙනවා.

ශ්‍රී ලංකාව සහ ඉන්දියාව අතර 'සියවස් මිතුදමක සෞභාග්‍යවත් අනාගතයකට බැඳීමක්' යන සංකල්පය තහවුරු කරමින් නරේන්ද්‍ර මෝදි මෙවර සංචාරයේ නිරත වන බවයි වාර්තා වන්නේ.

ජනාධිපති මාධ්‍ය අංශය සඳහන් කළේ ඉන්දීය අග්‍රාමාත්‍යවරයා සමඟ ඉන්දීය විදේශ අමාත්‍ය එස්. ජයශංකර් ඇතුළු නියෝජිත පිරිසක්ද මෙම සංචාරයට එක්වන බවයි.

ඉන්දියානු අග්‍රාමාත්‍යවරයා පිළිගැනීමේ නිල උත්සවය හෙට (05) උදෑසන කොළඹ නිදහස් චතුරස්‍ර පරිශ්‍රයේදී පැවැත්වීමට සැලසුම් කර තිබෙනවා.

නරේන්ද්‍ර මෝදි එදින ජනාධිපති ලේකම් කාර්යාලයේදී ජනාධිපති අනුර කුමාර දිසානායක සමඟ ද්වීපාර්ශවික සාකච්ඡාවල නිරත වීමටත් ද්වීපාර්ශවික නියෝජිතයන් අතර පැවැත්වෙන හමුවට සහභාගි වීමටත් සැලසුම් කර ඇති බව ජනාධිපති මාධ්‍ය අංශය වැඩිදුරටත් සඳහන් කළා.

මෙහිදී  බලශක්ති, ඩිජිටල්කරණ, ආරක්ෂක සහ සෞඛ්‍ය යන ක්ෂේත්‍රවලට අදාළව අවබෝධතා ගිවිසුම් සහ ඉන්දියාව සමඟ ණය ප්‍රතිව්‍යුහගතකරණයට අදාළ ගිවිසුම් හුවමාරු කර ගැනීමට නියමිතයි.

ඉන්දියානු සහයෝගීතාවෙන් සිදු කරන සාම්පූර් සූර්ය විදුලි බලාගාර ව්‍යාපෘතිය ආරම්භ කිරීමත්, උෂ්ණත්වය සහ ආර්ද්‍රතාවය පාලනය කළ හැකි මෙට්‍රික් ටොන් 5,000ක ධාරිතාවකින් යුත් දඹුල්ල කෘෂි ගබඩා සංකීර්ණය හා ඉන්දියානු පරිත්‍යාගයක් ලෙස ලැබුණු ආගමික ස්ථාන 5000ක හෙවිලි මත සූර්ය පැනල සවි කිරීමේ ව්‍යාපෘතිය විවෘත කිරීමත් ඉන්දියානු අග්‍රාමාත්‍යවරයා අතින් මාර්ගගත ක්‍රමය ඔස්සේ සිදු කරනු ලබනවා.

අප්‍රේල් 06වනදා පස්වරුවේ ශ්‍රී ලංකා සංචාරය නිල වශයෙන් නිම කරමින් නරේන්ද්‍ර මෝදි දිවයිනෙන් පිටත්ව යාමට නියමිත බවයි වර්තා වන්නේ.

(colombotimes.lk)