ආහාර සුරක්ෂිතතාව තහවුරු කිරීමට අදාළව ප්‍රතිපත්තිමය තීන්දු ගැනීම සඳහා ආහාර ප්‍රතිපත්ති හා සුරක්ෂිතතා කමිටුව 05වන වරටත් ඊයේ (01) රැස්වී තිබෙනවා.

ඒ ජනාධිපති ලේකම් කාර්යාලයේදීයි.

පාරිභෝගික ජනතාවට හිඟයකින් තොරව සහල් ලබාදීම අරමුණු කර ගනිමින් ඉදිරියේදී සහල් ආනයනය කිරීමට කමිටුව එහිදී නිර්දේශ කර තිබෙනවා.

මේ වන විට වෙළෙඳපොළේ සහල් මිල ඉහළ යාමක් සහ ඇතැම් සහල් වර්ගවල හිඟයක් ඇති බවයි වාර්තා වන්නේ.

පසුගිය කාලයේ පැවති අධික වර්ෂාව හේතුවෙන් අවස්ථා 2කදී වගා හානි සිදුවීම සමඟ අපේක්ෂිත අස්වැන්නේ සැලකිය යුතු පහළ යාමක් සිදුවී තිබෙනවා.

මේ අතර කැඩුණු සහල් අවශ්‍ය ප්‍රමාණ නිසි ක්‍රමවේද අනුගමනය කරමින් ආනයනය කිරීමට කෘෂිකර්ම අධ්‍යක්ෂ ජනරාල්වරයාගේ ප්‍රධානත්වයෙන් කමිටුවක් පත් කිරීමටද ආහාර සුරක්ෂිතතා කමිටුවේ අනුමැතිය හිමි වූ බවයි වාර්තා වන්නේ.

කෘෂිකර්ම, පශු සම්පත්, ඉඩම් සහ වාරිමාර්ග අමාත්‍ය කේ. ඩී. ලාල් කාන්තගේ සහ වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහගේ ප්‍රධානත්වයෙන් මෙම කමිටුව රැස්වී තිබෙනවා.

(colombotimes.lk)