දිවයිනේ ප්‍රදේශ කිහිපයක සිදු වූ රිය අනතුරුවලින් පුද්ගලයන් 6දෙනෙක් මියගොස් තිබෙනවා. 

පොලීසිය සඳහන් කළේ මොරවැව, කිලිනොච්චිය, අනුරාධපුර, වලස්මුල්ල සහ අරලගංවිල යන ප්‍රදේශවල මෙම අනතුරු සිදුවී ඇති බවයි. 

ඒ 9 මාර්ගයේ පරන්තන් ප්‍රදේශයේදී ලොරි රථයක් බස් රථයක ගැටීමෙන් අනතුරක් සිදුවී ඇති අතර එම අවස්ථාවේ මාර්ගයේ ගමන් කරමින් තිබූ යතුරුපැදියක් එම ලොරි රථයේ ගැටීමෙන් පැදිකරු සහ පසුපැදිකරු මියගොස් තිබෙනවා. 

එමෙන්ම මොරවැව අව්වනගර් ප්‍රදේශයේදී යතුරුපැදියක් පාපැදියක ගැටීමෙන් සිදු වූ අනතුරකින් 71 හැවිරිදි වියේ පසුවන තඹලගමුව ප්‍රදේශයේ පදිංචි පාපැදිකරු මියගොස් තිබෙන බවයි වාර්තා වන්නේ.

අනුරාධපුර මල්වතුඔය යකඩ පාලම අසලදී යතුරුපැදියක් පැදිකරුට පාලනය කර ගැනීමට නොහැකි වීමෙන් මාර්ගයෙන් ඉවතට පැන අසල පිහිටි ගසක ගැටිමෙන් සිදු වූ අනතුරකින් තරුණයෙක් මිය ගොස් තිබෙනවා.

පොලීසිය සඳහන් කළේ වලස්මුල්ල හක්මන මාර්ගයේ නතුවල ප්‍රදේශයේදී යතුරුපැදියක් සුනකයෙක්ගේ ඇඟේ ගැටී මාර්ගයේ පෙරලීයාමෙන් සිදු වූ අනතුරකින් 56 හැවිරිදි වියේ පසුවන මීඇල්ල ප්‍රදේශයේ පදිංචි පුද්ගලයෙක් මියගොස් තිබෙන බවයි. 

අරලගංවිල මනම්පිටිය මාර්ගයේ මැදගම ප්‍රදේශයේදී ද යතුරුපැදියක් මාර්ගය හරහා ගමන් කළ පදිකයෙක්ගේ ශරීරයේ ගැටීමෙන් අනතුරක් සිදුවී තිබෙනවා. 

පොලීසිය සඳහන් කළේ අනතුරින් බරපතල තුවාල ලැබූ 77 හැවිරිදි වියේ පසුවන දේවගල ප්‍රදේශයේ පදිංචි පදික පුද්ගලයා පොළොන්නරුව රෝහලට ඇතුළත් කිරීමෙන් අනතුරු මියගොස් ඇති බවයි. 

(colombotimes.lk)