ශ්‍රී ලංකා විදුලි බල සං‍ශෝධන පනතේ ස්වේච්ඡා විශ්‍රාමයාමේ යෝජනා ක්‍රමයේ නියමයන් හා කොන්දේසි ගැසට් කර තිබෙනවා. 

බලශක්ති අමාත්‍ය කුමාර ජයකොඩිගේ අත්සනින් යුතුව නිකුත් කර ඇති අදාළ ගැසට් නිවේදනය මඟින් ස්වේච්ඡාවෙන් විශ්‍රාමයාම සඳහා හිමිකම් ලබන විදුලිබල මණ්ඩල සේවකයන්ට අදාළ නියමයන් හා කොන්දේසි මෙලෙස ගැසට් කර ඇති බවයි සඳහන් වන්නේ. 

2024 අංක 36 දරන ශ්‍රී ලංකා විදුලිබල පනතේ 18වන වගන්තියේ 03වන උප වගන්තියට අදාළව මෙම නියෝග ප්‍රකාශ කර තිබෙනවා. 

ඒ අනුව ලංකා විදුලි බල මණ්ඩලයේ ස්ථිර කාර්යය මණ්ඩලය යටතේ සේවය කරන සේවකයෙක්ට ස්වේච්ඡා විශ්‍රාමයාමේ යෝජනා ක්‍රමයට අනුව ගෙවන වන්දි මුදල් මෙම ගැසට් නිවේදනය මඟින් තවදුරටත් ප්‍රකාශයට පත්කර තිබෙනවා. 

වසර 10ක් හෝ ඊට වැඩි සේවා කාලයක් සපුරා ඇති සේවකයෙක් ස්වේච්ඡාවෙන් විශ්‍රාම යන අවස්ථාවකදී ඔහු සේවයේ යෙදුනු සේවා කාලයේ සෑම මාස 12ක් සඳහාම මාස 02ක වැටුප සහ සේවය කිරීමට ඉතිරිව ඇති කාලයේ සෑම මාස 12ක් සඳහාම මාස එකහමාරක වැටුප වන්දි වශයෙන් හිමිවන බවද එම ගැසට් නිවේදනයේ සඳහන්.

වසර 10කට වඩා අඩු සේවා කාලයක් ඇති සේවකයන් සඳහා සේවය කළ සේවා කාලයට අදාළ සෑම මාස 12ක් සඳහා මාස 5ක වැටුප වන්දි වශයෙන් පිරිනැමෙන අතර සේවය කිරීමට ඉතිරිව ඇති කාලයට අදාළව කිසිදු ගෙවීමක් නොගෙවන බවඳ එහි වැඩිදුරටත් සඳහන් වනවා. 

ඊට අමතරව කොන්ත්‍රාත් පදනම යටතේ සේවය කරන සේවකයන්ට වන්දි ලබාදෙන ආකාරය මෙන්ම තවත් නියමයන් සහ කොන්දේසි කිහිපයක් ආදාළ ගැසට් නිවේදනය මඟින් ප්‍රකාශයට පත්කර තිබෙනවා. 


(colombotimes.lk)