අධිවේගී මාර්ගවල ගමන්ගන්නා මගී ප්‍රවාහන බස් රථවල මගීන්ට ආසන පටි පැළදීම අනිවාර්ය කිරීමේ ගැසට් නිවේදනය නිකුත් කරන බව ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක ප්‍රකාශ කළා.
 
ඒ ප්‍රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්‍යාංශ උපදේශක කාරක සභාවේදීයි.

එමෙන්ම අධිවේගී මාර්ගවල ගමන් කරන පාසල් බස් රථ, කාර්යාල සේවා ප්‍රවාහන බස් රථ, විනෝද චාරිකා බස් රථ සහ අනෙකුත් බස් රථ සඳහා ද ආසන පටි සැකසීමට මාස 3ක පමණ කාලයක් ලබාදෙන බවද අමාත්‍යවරයා සඳහන් කළා. 

අමාත්‍යවරයා  වැඩිදුරටත් කියා සිටියේ රුපියල් 2000ක පමණ මිලකට පැවති ආසන පටි මිල රුපියල් 5000ත් 7000ත් අතර මිලක් දක්වා මේ වන විට ඉහළ ගොස් ඇති බවයි.

ඒ පිළිබඳව පාරිභෝගික කටයුතු පිළිබඳ අධිකාරියෙන් ‍පරීක්ෂා කර බැලිය යුතු බවද අමාත්‍යවරයා සඳහන් කළා. 

අමාත්‍යවරයා වැඩිදුරටත් කියා සිටියේ දුර ගමන් සේවා බස් රථ සඳහාද ආසන පටි පැළදීම අනිවාර්ය කිරීම සම්බන්ධයෙන් ජනතාවගේ අදහස් විමසූ බවත් මේ සම්බන්ධයෙන් සියලුමදෙනා සිය කැමැත්ත පළ කළ බවයි.
 
ඒ අනුව ඉදිරියේදී දුරගමන් සේවා බස් රථ සඳහා ද ආසන පටි පැළදීම අනිවාර්ය කිරීමට සැලසුම් කර ඇති බව ඔහු වැඩිදුරටත් කියා සිටියා. 

(colombotimes.lk)