යාපනය - නුවර ප්‍රධාන මාර්ගයේ පරන්තන් මංසන්ධිය ආසන්නයේ අද (29) අලුයම අනතුරක් සිදු වී තිබෙනවා.

එම රිය අනතුරෙන් පුද්ගලයන් දෙදෙනෙක් ජීවිතක්ෂයට පත්ව තිබෙන බවයි වාර්තා වන්නේ.  

යාපනය සිට නුවර බලා ධාවනය වූ  ශ්‍රී ලංකා ගමනාගමන මණ්ඩලයේ බස් රථයක් ටිපර් රථයක් හා යතුරුපැදියක් එකිනෙකට ගැටීමෙන් අනතුර සිදුවූ බව කිලිනොච්චිය පොලීසිය සඳහන් කළා. 

බස් රථය මාර්ගය ආසන්නයේ නවතා තිබියදී පසුපසින් පැමිණි ටිපර් රථයක් බස් රථයේ පළමුව ගැටී තිබෙන බවයි වාර්තා වන්නේ.
 
අනතුරුව ටිපර් රථයට පසුපසින් පැමිණි යතුරුපැදිය ටිපර් රථයේ ගැටීමෙන් අනතුර සිදුවී තිබෙනවා. 

එම අනතුරින් යතුරුපැදියේ ගමන්ගත් පුද්ගලයන් දෙදෙනාගෙන් එක් පුද්ගලයෙක් අදාළ ස්ථානයේදීම ජීවිතක්ෂයට පත්ව තිබෙන බවයි වාර්තා වන්නේ.

බරපතළ තුවාල ලබා කිලිනොච්චිය රෝහලට ඇතුළත් කිරීමෙන් අනතුරුව අනෙක් පුද්ගලයා ජීවිතක්ෂයට පත්ව තිබෙනවා. 

සිද්ධිය සම්බන්ධයෙන් කිලිනොච්චිය පොලීසිය වැඩිදුර පරීක්ෂණ සිදු කරන බවයි වාර්තා වන්නේ. 


(colombotimes.lk)