නිල්වලා ගඟ හරහා ඉදිකර තිබෙන ලවණ බාධකය හේතුවෙන් මතුව ඇති ගැටලු සඳහා දීර්ඝ කාලීන විසඳුමක් ලබාදෙන තෙක් ප්‍රදේශයේ වාරි ගැටලු විසඳීමට කෙටි කාලීන පියවර රැසක් යෝජනා වී තිබෙනවා.

ජනාධිපති මාධ්‍ය අංශය සඳහන් කළේ මේ පිළිබඳව පසුගියදා ජනාධිපති ලේකම් ආචාර්ය නන්දික සනත් කුමානායක සහ මෙම ගැටලුව හා සම්බන්ධ සියලුම අමාත්‍යාංශ හා ආයතනවල නිලධාරීන් අතර පැවති සාකච්ඡාවේදී එම යෝජනා කඩිනමින් ක්‍රියාවට නැංවීමට එකඟතාව පළ වූ බවයි.

ඒ අනුව ලවණ බාධකය ඉදිකිරීමේදී ඉවත් කළ ගඟ අසල ඉඩමක ගොඩගසා තිබෙන පස් කන්ඩි ගංවතුර සමයේ ජලය පහසුවෙන් බැස යාමට හැකිවන පරිදි ඉවත් කිරීම, ලවණ බාධකය දෙපස ඉදිකර තිබෙන Sheet File බාධකයේ උස අඩුකර ජලය අපහසුවෙන් බැස යාමට සැලැස්වීම, ගඟ පතුලෙහි පිරී ඇති වැලි ඉවත් කිරීම, ජල මාර්ග අවහිර වන ලෙස සැකසී ඇති බාධා ඉවත් කර පහසුවෙන් ජලය බැස යාමට හැකිවන පරිදි අතුරු ඇල මාර්ග පිරිසිදු කිරීම සහ කුඹුරුවල පිරෙන ජලය ඉවත් කිරීමට ඉදි කර ඇති ජල පොම්පාගාර නිසි පරිදි නඩත්තු කිරීමට නියමිතව තිබෙනවා.

මේ අතර නිල්වලා ගඟ හරහා ඉදිකර ඇති ලවණ බාධකය හේතුවෙන් මතුව ඇති ගැටලු සඳහා දීර්ඝ කාලීන විසඳුම් ලබාදීමට පේරාදෙණිය විශ්වවිද්‍යාලය මඟින් අධ්‍යයනයක් සිදු කිරීම ආරම්භ කර ඇති බවයි වාර්තා වන්නේ.

(colombotimes.lk)