මහජන බැංකු ක්‍රීඩා වර්ණ ප්‍රදාන උළෙල 2024 (People's Bank Sports Awards 2024) පසුගියදා උත්කර්ෂවත් අයුරින් පවත්වා තිබෙනවා.

ඒ අත්තිඩිය, ඊගල්ස් ලේක්සයිඩ් හෝටලයේදීයි.

මෙම උළෙල මහජන බැංකු ක්‍රීඩා සමාජය විසින් සංවිධානය කර තිබෙන බවයි වාර්තා වන්නේ.

මෙහිදි 2018 වසරේ සිට මේ දක්වා මහජන බැංකුව නියෝජනය කරමින් ජනසතු සේවා, අන්තර් බැංකු සහ ජාත්‍යන්තර තරගවලින් ජයග්‍රහණ හිමිකරගත් ක්‍රීඩක ක්‍රීඩිකාවන් 212 දෙනෙක් වෙත වර්ණ ප්‍රදානය කර තිබෙනවා.

එමෙන්ම 2019 හා 2023 වසරවල පැවති අන්තර් ප්‍රාදේශීය කණ්ඩායම් ක්‍රීඩා තරගවල ජයග්‍රාහී ප්‍රාදේශිකයන්ට සහ මහජන බැංකු ගෘහස්ථ ක්‍රීඩා තරගවල ජයග්‍රාකයන්ට ජය සංකේත ප්‍රදානය කළ අතර ඒ යටතේ ක්‍රීඩක ක්‍රීඩිකාවන් 216 දෙනෙක් වෙත පදක්කම් පිරිනමා තිබෙන බවයි වාර්තා වන්නේ.  

මීට අමතරව අදාළ කාලය තුළ විශ්‍රාම ලැබූ ජ්‍යෙෂ්ඨ ක්‍රීඩක ක්‍රීඩිකාවන් 20 දෙනෙක්ගේ සේවයද ඇගයීමකට ලක් කරමින් විශේෂ තිළිණ ප්‍රදානයක්ද සිදු වුණා.

මහජන බැංකුවේ ප්‍රධාන විධායක නිලධාරි/ සාමාන්‍යාධිකාරි ක්ලයිව් ෆොන්සේකා මහතාගේ ප්‍රධානත්වයෙන් පැවති මෙම වර්ණ ප්‍රදාන උළෙලට  මහජන බැංකුවේ  ආයතනික හා විධායක කළමනාකාරිත්වය සහ ක්‍රීඩක ක්‍රීඩිකාවන් විශාල පිරිසක්ද සහභාගි වී තිබෙනවා.