01. රාජිත සේනාරත්න රිමාන්ඩ්

අල්ලස් කොමිසම විසින් ගොනුකර තිබූ නඩුවක් සඳහා කොළඹ මහාධිකරණය හමුවේ අද (29) පෙරවරුවේ පෙනී සිටි හිටපු අමාත්‍ය රාජිත සේනාරත්න රක්ෂිත බන්ධනාගාරගත කිරීමට නියෝග කර තිබෙනවා. 

කොළඹ මහාධිකරණ විනිසුරු ලංකා ජයරත්න මෙනෙවිය හමුවට රාජිත සේනාරත්න ඉදිරිපත් කිරීමෙන් අනතුරුව මෙම නියෝගය නිකුත් කර තිබෙන බවයි වාර්තා වන්නේ. 

ඒ අනුව ඔහුව එළඹෙන සැප්තැම්බර් මස 09වනදා දක්වා රක්ෂිත බන්ධනාගාරගත කිරීමට කොළඹ මහේස්ත්‍රාත් අධිකරණය නියම කර තිබෙනවා.   



02. පූජ්‍ය අතුරලියේ රතන හිමියන් රිමාන්ඩ්

නුගේගොඩ අධිකරණයට පැමිණි පූජ්‍ය අතුරලියේ රතන හිමියන් රක්ෂිත බන්ධනාගාර ගත කර තිබෙනවා.

ඒ සැප්තැම්බර් මස 12වනදා දක්වායි. 

2020 මහමැතිවරණයෙන් අපේ ජනබල පක්ෂයට ලැබුණු ජාතික ලැයිස්තු මන්ත්‍රී ධූරය පූජ්‍ය අතුරලියේ රතන හිමියන්ට ලබා ගැනීම සඳහා තමා පැහැරගෙන ගොස් ලිපි ලේඛන කිහිපයකට බලහත්කාරයෙන් අත්සන් ගත් බවට පූජ්‍ය වේදෙනිගම විමලතිස්ස හිමියන් කොළඹ අපරාධ කොට්ඨාසයට ඉදිරිපත් කළ පැමිණිල්ලක් සම්බන්ධයෙන් රතන හිමියන්ට වරෙන්තු නිකුත් වී තිබෙනවා. 



03. හිටපු රාජ්‍ය අමාත්‍ය නිමල් ලන්සා රිමාන්ඩ්

කොච්චිකඩේ පොලීසියට භාර වූ හිටපු රාජ්‍ය අමාත්‍ය නිමල් ලාන්සා රක්ෂිත බන්ධනාගාරගත කර තිබෙනවා.

ඒ එළඹෙන සැප්තැම්බර් මස 12වනදා දක්වායි. 



04. තායිලන්ත අගමැතිනිය ධූරයෙන් නෙරපයි

තායිලන්ත අග්‍රාමාත්‍ය Paetongta Shinawatra ධූරයෙන් ඉවත් කිරීමට එරට ආණ්ඩුක්‍රම ව්‍යවස්ථා අධිකරණය නියෝග කර තිබෙනවා.

විදෙස් මාධ්‍ය වාර්තා කළේ කාම්බෝජයේ හිටපු නායකයා සමඟ කළ මතභේදාත්මක දුරකථන සංවාදයක් සම්බන්ධයෙන් ඇයට චෝදනා එල්ල වී තිබෙන බවයි.
 
අගමැති ධූරය සඳහා නව ඡන්ද විමසීමක් පැවැත්වීමට නියමිත අතර එතෙක් රටේ නියෝජ්‍ය අගමැතිවරයා එම ධූරයේ රාජකාරී කිරීමට නියමිතයි.

ආණ්ඩුක්‍රම ව්‍යවස්ථා අධිකරණයේ විනිසුරුවරුන් 09දෙනාගෙන් 6දෙනෙක් Paetongta Shinawatraට එරෙහිව තීරණය කර ඇති අතර 3දෙනෙක් ඇය නිවැරදිකාරිය බවට තීරණය කර තිබෙනවා. 




05. හිටපු ජනපති රනිල් රෝහලින් පිටව යයි

කොළඹ ජාතික රෝහලේ නේවාසිකව ප්‍රතිකාර ලබමින් සිටි හිටපු ජනාධිපති රනිල් වික්‍රමසිංහ අද (29) පස්වරුවේ රෝහලෙන් පිටව ගොස් තිබෙනවා.

රෝහලෙන් බැහැරව ගියද ලබාදී තිබෙන වෛද්‍ය උපදෙස්වලට අනුව ඔහු නිවසේ තවදුරටත් විවේක ගැනීමට නියමිතයි.

නිවසේ රැඳී සිටින කාලය තුළදී ඔහුගේ සෞඛ්‍ය තත්ත්වය සම්බන්ධයෙන් පවුලේ වෛද්‍යවරු දැඩි අධීක්ෂණයෙන් කටයුතු කිරීමට නියමිතව තිබෙනවා. 



06. ශෂීන්ද්‍රගේ ඇප ඉල්ලීම ඉවතට

දූෂණය නැමති චෝදනාවක් සම්බන්ධයෙන් රක්ෂිත බන්ධනාගාරගත කර සිටි හිටපු රාජ්‍ය අමාත්‍ය ශෂීන්ද්‍ර රාජපක්ෂගේ ඇප ඉල්ලීම ප්‍රතික්ෂේප කිරීමට කොළඹ මහේස්ත්‍රාත් අධිකරණය නියම කර තිබෙනවා. 

ඒ අනුව සැකකරු ලබන 12වනදා දක්වා යළිත් රක්ෂිත බන්ධනාගාරගත කරන බව කොළඹ ප්‍රධාන මහේස්ත්‍රාත් අසංක එස්. බෝදරගම අද (29) නියෝග කර තිබෙන බවයි වාර්තා වන්නේ.  




07. ආචාර්ය නන්දලාල් වීරසිංහට A ශ්‍රේණියේ ඇගයීමක්

ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මෙවර Global Finance’s Central Banker Report Cards 2025 'A' ශ්‍රේණියක් ලබාගැනීමට සමත්වී තිබෙනවා. 

එමෙන්ම මෙම ඉහළම මට්ටමේ පිළිගැනීමත් සමඟ නන්දලාල් වීරසිංහගේ නාමයද ලොව පුරා සිටින ගෞරවනීය ප්‍රභූ මහ බැංකු අධිපතිවරුන් අතරට එක්ව තිබෙන බවයි වාර්තා වන්නේ. 

ශ්‍රී ලංකාව මුහුණදුන් ආර්ථික අර්බුදයේදී මෙරට ආර්ථිකය ස්ථාවර කිරීමට ඔහු දැක්වූ සුවිශේෂී දායකත්වය සහ උපායමාර්ගික දැනුම සැලකිල්ලට ගෙන ඔහුට මෙම 'A' ශ්‍රේණිය ලබාදී තිබෙනවා. 

මෙම ඇගැයීම 1994 සිට සිදු කරන අතර ඒ සඳහා ලොව ප්‍රධාන පෙළේ රටවල් 100කට ආසන්න මහ බැංකු අධිපතිවරුන් ඇගයීම සිදු කරන බවයි වාර්තා වන්නේ. 

උද්ධමනය පාලනය, ආර්ථික වර්ධන ඉලක්ක, මුදල් ස්ථාවරත්වය, පොලී අනුපාත කලමනාකරණය සහ දේශපාලන ස්වාධීනත්වය වැනි ක්ෂේත්‍රවල සාර්ථකත්වය මත 'A+' සිට 'F'දක්වා වූ කාණ්ඩ යටතේ මෙලෙස ලොව පුරා සිටින මහ බැංකු අධිපතිවරුගේ සාර්ථකත්වය සහ අසාර්ථකත්වය මනිනු ලබනවා.



(colombotimes.lk)