නොවැම්බර් 21වනදා නුගේගොඩදී පැවැත්වීමට නියමිත ආණ්ඩු විරෝධී රැළිය, රජය ජනතාවට දුන් පොරොන්දු මතක් කිරීම අරමුණු කරගත් එකක් බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ ප්‍රකාශ කළා. 

ඒ හිටපු ජනාධිපති රනිල් වික්‍රමසිංහගේ පක්ෂ කාර්යාලයේ ඊයේ (12) පැවති සාකච්ඡාවකින් අනතුරුව මාධ්‍ය වෙත අදහස් දක්වමින්. 

එහිදී ඔහු වැඩිදුරටත් කියා සිටියේ විපක්ෂයේ විවිධ පක්ෂ රැසක් දැනටමත් මෙම සාකච්ඡාවලට එක්ව ඇති බවයි. 

එමෙන්ම අතීතයේදී සාකච්ඡා පැවතියේ පොදුජන පෙරමුණ තුළ පමණක් වූ අතර මේ වන විට අප විපක්ෂයේ සියලු පක්ෂ සමඟ සාකච්ඡා කරන බව ද ඔහු ප්‍රකාශ කළා. 

ඔහු වැඩිදුරටත් කියා සිටියේ එම රැළිය ජනතාවට දුන් පොරොන්දු ඉටු කිරීමට බල කිරීම අරමුණු කරගත් බවත්, රජයේ ප්‍රතිපත්ති නිසා බලපෑමට ලක්වූ බොහෝ දෙනාත් මෙම රැළියට එක්වන බවයි.
 
ඒ අනුව ශ්‍රී ලංකා නිදහස් පක්ෂය, එක්සත් ජාතික පක්ෂය සහ තවත් පක්ෂ රැසක් ද රැළියට එක්වීමට එකඟ වී තිබෙනවා. 

නාමල් රාජපක්ෂ වැඩිදුරටත් කියා සිටියේ තවත් පක්ෂවල සහභාගීත්වය ඔවුන්ගේ අභ්‍යන්තර සාකච්ඡා අවසන් වූ පසු තීරණය කරන බවයි. 

(colombotimes.lk)