සනත්ට, මහේලට, සංගට බැරි වූ එක්දින ද්විත්ව ශතකය පැතුම් නිශ්ශංකගේ පිත්තෙන්

BY COLOMBO TIMES ON February 09, 2024 - 6:26 PM

එක්දින ඉනිමකදී වැඩිම ලකුණු ලබාගත් ශ්‍රී ලාංකික පිතිකරුවාගේ වාර්තාව මෙන්ම ශ්‍රී ලංකාව වෙනුවෙන් පළමු එක්දින ද්විත්ව ශතකය රැස් කළ පිතිකරුවා වන්නට පැතුම් නිශ්ශංක අද සමත් වුණා.

ඒ ඇෆ්ගනිස්තානය සමඟ පල්ලෙකැලේ ජාත්‍යන්තර ක්‍රිකට් ක්‍රීඩාංගණයේ පැවැත්වෙන පළමු එක්දින තරගයේදීයි.

පැතුම් අද සහභාගී වූයේ සිය 50 වන එක්දින තරගයටයි.

ඇෆ්ගන් පන්දු යවන්නන් තඹ සතයකට මායිම් නොකළ පැතුම් නිශ්ශංක අද පන්දු 139 දී 4 පහර 20ක් සහ 6 පහර 8ක් සමඟ නොදැවී ලකුණු 210ක් ලබා ගත්තා.

ඒ අනුව අද පැතුම් බිඳ හෙලුවේ වසර 24කට පෙර සනත් ජයසූරිය සාජා පිටියේදී ඉන්දියාවට එරෙහිව ලකුණු 189ක් ලබා ගෙන තැබූ වාර්තාවයි.

එමෙන්ම පල්ලෙකැලේ ජාත්‍යන්තර ක්‍රීඩාංගණයේදී පිතිකරුවෙක් ලබාගත් ඉහළම ලකුණු සංඛ්‍යාව ද මෙයයි.

මීට පෙර එම වාර්තාව හිමිකරගෙන සිටියේ සිම්බාබ්වේ කණ්ඩායමට එරෙහිව ලකුණු 144ක් රැස් කළ තිලකරත්න ඩිල්ශාන් විසින්.

එමෙන්ම එක්දින ද්විත්ව ශතකයක් ලබාගත් ලොව 10 වන පිතිකරුවා ලෙසද පැතුම් නිශ්ශංක අද ඉතිහාස ගත වුණා.

අද ඇෆ්ගනිස්තාන ඇරයුමෙන් පළමුව පන්දුවට පහර දුන් ශ්‍රී ලංකා කණ්ඩායම පන්දුවාර 50 අවසානයේ කඩුලු 3ක් බිඳ වැටී ලකුණු 381ක් ලබා ගත්තා.

ඒ අනුව ඇෆ්ගනිස්තානයට හිමිවන ඉලක්කය ලකුණු 382ක්.

(colombotimes.lk)