යම් හෙයකින් පුද්ගලයකුට අධි රුධිර පීඩන තත්ත්වය පැවතිය හොත් පෙනීමේ දුර්වලතා, හෘදයාබාධ, වකුගඩු අකර්මණ්‍ය වීම, පාදවල ලේ ධමනි තදවීම, ආඝාතය හෙවත් අංශභාගය ඇතුළු බරපතළ තත්ත්වයේ රෝගයන්ට ගොදුරු වීමේ වැඩි ප්‍රවණතාවක් තිබෙන බවයි මහාචාර්යවරයා අනතුරු අඟවන්නේ. 

 

අධිරුධිර පීඩන රෝග තත්ත්වය පුද්ගලයකුට ඇති බව බොහෝවිට හඳුනාගන්නේ වෙනත් රෝග තත්ත්වයන්ට ප්‍රතිකාර ගැනීම සඳහා යොමුවන අවස්ථාවේදී බවත් කාලයක් පුරා සිරුර තුළ අධි රුධිර පීඩන තත්ත්වයක් පැවතියහොත් සිරුරේ සෙසු අවයවවලට එහි බලපෑමෙන් හානි වීමේ ඉහළ හැකියාවක් ද තිබෙන බවත් වෛද්‍යවරයා අවධාරණය කළා. 

 

ඕනෑම පුද්ගලයකුට තමන්ගේ දෛනික චර්යා රටාව වෙනස් කර ගැනීම මගින් අධි රුධිර පීඩන තත්ත්වයෙන් මිදී සාමාන්‍ය නීරෝගී සෞඛ්‍ය තත්ත්වයක් පවත්වා ගත හැකි බැවින් මෙම රෝග තත්ත්වය කල්තියා හඳුනා ගැනීමට කටයුතු කරන ලෙස මහාචාර්යවරයා ඉල්ලීමක් කරනවා. 

 

එමෙන්ම මැදිවියේ පුද්ගලයන්ගේ හදිසියේ සිදුවන අහේතුක මරණවලට කලින් හඳුනා නොගත් අධි රුධිර පීඩන තත්ත්වය හේතු විය හැකි බැවින් වහාම ළඟම රෝහල වෙත හෝ පවුලේ වෛද්‍යවරයා වෙත ගොස් රුධිර පීඩනය මැන බලා ගන්නා ලෙසයි වෛද්‍යවරයා වැඩිදුරටත් පැවසුවේ.
(colombotimes.lk)