රජයේ විකිරණ විද්‍යා තාක්ෂණවේදීන්ගේ සංගමයට අනුව රජයේ රෝහල්වල සීටී ස්කෑන් යන්ත්‍ර 44ක් තිබෙනවා. 

 

ඒ අනුව කොළඹ ජාතික රෝහලේ හදිසි ප්‍රතිකාර ඒකකයේ සීටී ස්කෑන් යන්ත්‍ර 12ක්, කුරුණෑගල, කරාපිටිය, ත්‍රිකුණාමලය, හම්බන්තොට, බදුල්ල, රත්නපුර, කළුතර, හොරණ, ජාතික දන්ත රෝහල, සිරිමාවෝ බණ්ඩාරනායක විශේෂිත ළමා රෝහල සහ මාතර රෝහලේ සෙසු සී.ටී. ක්‍රියාත්මක නොවීම නිසා රෝගීන්ට සහ වෛද්‍යවරුන්ට ද විශාල අපහසුතාවයක් ඇති කර තිබෙන බවයි වාර්තා වන්නේ. 

 

සමහර යන්ත්‍ර මාස ගාණකින් ක්‍රියාත්මක නොවන බවත් සමස්තයක් වශයෙන් ගත් කල, පෞද්ගලික රෝහල්වලට යාමට හැකියාවක් නොමැති මේ ප්‍රශ්නයේ වැඩි බරක් දරා ගැනීමට සිදුව ඇත්තේ දුප්පත් ජනතාවට බවයි ඔවුන් පෙන්වා දෙන්නේ. 

 

සෞඛ්‍ය අමාත්‍යාංශය මේ යන්ත්‍ර නිවැරදි කර පද්ධතියට ගෙන ඒමට කඩිනම් පියවර ගත යුතු බවයි විකිරණවේදීන්ගේ සංගමය පවසන්නේ. 

 

මේ සම්බන්ධයෙන් අදහස් දක්වමින් රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ මහතා කියා සිටියේ මෙම යන්ත්‍ර ක්‍රියා විරහිත වීම හේතුවෙන් ඇතැම් රෝග නිවැරදිව හඳුනා ගැනීමට වෛද්‍යවරුන් ද දුෂ්කරතාවන්ට මුහුණ දෙන බවත් එමඟින් ව්‍යාකූලත්වයට පත්වන බවයි. 

 

මේ අතර සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා ප්‍රවෘත්ති සාකච්ඡාවකට එක්වෙමින් කියා සිටියේ “පසුගිය වසර දෙක තුළ සෞඛ්‍ය අමාත්‍යාංශයට ප්‍රමාණවත් මුදල් ලබා නොදීම නිසා මෙම යන්ත්‍ර ප්‍රතිසංස්කරණය කිරීම ප්‍රමාද වී ඇති” බවයි.

 

කෙසේ වෙතත්, මෙම යන්ත්‍ර මාසයක් ඇතුළත අලුත්වැඩියා කිරීමට කඩිනම් පියවර ගනිමින් සිටින බව ඔහු වැඩිදුරටත් පැවසුවා. 

 

පරිගණක ගත ටොමොග්‍රැෆි (CT) ස්කෑන් මගින් මිනිස් සිරුර වටා විවිධ කෝණවලින් ලබාගත් X-ray රූප මාලාවක් ඒකාබද්ධ කරන අතර ශරීරය තුළ ඇති අස්ථි, රුධිර නාල සහ මෘදු පටක වල හරස්කඩ රූප (පෙති) නිර්මාණය කිරීමට පරිගණක සැකසුම් භාවිතා කරන අතර CT ස්කෑන් රූප සාමාන්‍ය X-ray රූපවලට වඩා සවිස්තරාත්මක තොරතුරු සපයනු ලබනවා.
(colombotimes.lk)