01. තෙවන පාසල් වාරය අදින් ඇරඹෙයි 

2025 වසරේ රජයේ සහ රජය අනුමත පෞද්ගලික සිංහල හා දෙමළ පාසල්වල තෙවන වාරය අද (18) සිට ආරම්භ 

අධ්‍යාපන අමාත්‍යාංශය සඳහන් කළේ මුස්ලිම් පාසල් සඳහා තෙවන පාසල් වාරය ලබන 25වනදා ආරම්භවීමට නියමිත බවයි.

එමෙන්ම අදින් ඇරඹෙන තෙවන පාසල් වාරයේ පළමු අදියර ඔක්තෝබර් 17වනදා දක්වා ක්‍රියාත්මක වීමට නියමිතයි.



02. තැපැල් වර්ජනය තවදුරටත්

තැපැල් හා විදුලි සංදේශ නිලධාරීන්ගේ සංගමය සහ ඒකාබද්ධ තැපැල් වෘත්තීය සමිති පෙරමුණ ආරම්භ කළ අඛණ්ඩ වැඩවර්ජනය තවදුරටත් ක්‍රියාත්මක වනවා. 

මෙම වර්ජනය ඉල්ලීම් 19ක් මුල් කර ගනිමින් ඊයේ (17) පස්වරු 4.00 සිට ආරම්භ කර තිබෙන බවයි වාර්තා වන්නේ. 

මධ්‍යම තැපැල් හුවමාරුවෙන් ආරම්භ වූ මෙම වැඩවර්ජනය ඊයේ මධ්‍යම රාත්‍රී 12.00 සිට දිවයින පුරා ක්‍රියාත්මක බව තැපැල් වෘත්තීය සමිති පෙරමුණ සඳහන් කළා. 

ඒකාබද්ධ තැපැල් වෘත්තීය සමිති පෙරමුණේ සම කැඳවුම්කරු චින්තක බණ්ඩාර සඳහන් කළේ මේ හේතුවෙන් අද දිනයේදී සියලුම තැපැල් කටයුතු අඩපණ වන බවයි.
 
තැපැල් සේවකයන්ගේ ඉල්ලීම් රැසක් ලබාදී තිබියදී මෙලෙස වර්ජනයක නිරත වීම අසාධාරණ බව අදාළ වැඩවර්ජනය සම්බන්ධයෙන් කොළඹ පැවති මාධ්‍ය හමුවකදී තැපැල්පති රුවන් සත්කුමාර සඳහන් කළා. 


03. බෝට්ටු අනතුරක් - 40ක් අතුරුදන්

නයිජීරියාවේ වයඹදිග සොකෝටෝ ප්‍රාන්තයේ බෝට්ටු අනතුරක් සිදු වී තිබෙනවා.

විදෙස් මාධ්‍ය වාර්තා කළේ එම අනතුරෙන් පුද්ගලයින් 40දෙනෙක් අතුරුදන් වූ බවයි. 

එමෙන්ම මගීන් 50දෙනෙක්ට ආසන්න පිරිසක් රැගත් බෝට්ටුවක් මෙලෙස අනතුරට පත් වූ බව විදෙස් මාධ්‍ය වාර්තා කළා. 

ඉන් පුද්ගලයන් 10දෙනෙක් පමණ බේරාගෙන ඇති අතර තවත් මගීන් 40කට වැඩි පිරිසක් තවමත් අතුරුදහන් වී තිබෙන බවයි වාර්තා වන්නේ.




04. ප්‍රසන්න රණවීර යළි රිමාන්ඩ්

හිටපු රාජ්‍ය අමාත්‍ය ප්‍රසන්න රණවීර යළි රක්ෂිත බන්ධනාගාර ගත කර තිබෙනවා.

ඒ ලබන 25වනදා දක්වායි.
 
ඔහුව අද (18) මහර මහේස්ත්‍රාත් අධිකරණය හමුවට ඉදිරිපත් කිරීමෙන් අනතුරුව මෙම නියෝගය ලබාදී තිබෙනවා.