අද දවස උණුසුම් කළ පුවත් සියල්ල මෙන්න | The 7PM Report

BY COLOMBO TIMES ON August 28, 2025 - 7:01 PM

01. අස්ගිරි පාර්ශවයේ අභිනව අනුනායක හිමියෝ පත්වෙති

පුරප්පාඩු වී තිබූ අස්ගිරි පාර්ශවයේ අනුනායක ධූරය සඳහා අස්ගිරි පාර්ශවයේ නියෝජ්‍ය ලේඛකාධිකාරී, අස්ගිරි මහ පිරිවෙනේ විශ්‍රාමික පරිවේනාධිපති ශාස්ත්‍රපති, අති ගෞරවාර්ථ පූජ්‍ය නාරම්පනාවේ ආනන්ද හිමියෝ තේරීපත්වී තිබෙනවා.

මෙම ධූරය සඳහා වූ නිලවරණය අස්ගිරි පාර්ශවයේ මහානායක වරකාගොඩ ඥාණරතන නාහිමිගේ ප්‍රධානත්වයෙන් අද (28) පස්වරු 2.00ට ආරම්භ වුණා.

ඒ මහනුවර අස්ගිරි මහා විහාරයේ ඓතිහාසික උපෝසතාගාරයේදීයි.

මේ සඳහා අස්ගිරි කාරක මහා සංඝ සභාවේ හිමිවරුන් 19දෙනෙක් ඡන්දය ප්‍රකාශ කිරීම සඳහා සුදුසුකම් ලබා තිබෙනවා.

02. උදය ගම්මන්පිලට එරෙහිව විමර්ශනයක්

හිටපු පාර්ලිමේන්තු මන්ත්‍රී උදය ගම්මන්පිලට එරෙහිව විමර්ශනයක් ආරම්භ කර ඇති බව අපරාධ පරීක්ෂණ දෙපාර්තමේන්තුව ඊයේ (27) කොටුව මහේස්ත්‍රාත් අධිකරණයට දැනුම්දී තිබෙනවා.

ඒ 2025 අගෝස්තු 05වනදා පැවති ප්‍රවෘත්ති සාකච්ඡාවකදී ජාතීන් අතර අසමගිය ඇති වන ආකාරයේ ප්‍රකාශ සිදු කිරීම සම්බන්ධයෙන්.

පසුගිය අගෝස්තු 08වනදා ලද පැමිණිල්ලකට අනුව මෙම විමර්ශනය සිදුකරන බව එම දෙපාර්තමේන්තුව අධිකරණයට කරුණු දක්වමින් සඳහන් කළා.

ඒ අනුව සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුති පනතේ සහ දණ්ඩ නීති සංග්‍රහය යටතේ මෙම විමර්ශනය සිදු කරන බවයි වාර්තා වන්නේ.

03. තුසිත හල්ලොලුව තවදුරටත් රිමාන්ඩ්

ජාතික ලොතරැයි මණ්ඩලයේ හිටපු අධ්‍යක්ෂවරයෙක් වන තුසිත හල්ලොලුව තවදුරටත් රක්ෂිත බන්ධනාගාර ගත කරන ලෙස කොළඹ මහේස්ත්‍රාත් අධිකරණය නියම කර තිබෙනවා.

ඒ එළඹෙන සැප්තැම්බර් 4වනදා දක්වායි.

04. කුලියාපිටිය අනතුරේ ටිපර් රථ රියදුරා රිමාන්ඩ්

පාසල් සිසුවියන් දෙදෙනෙක් ඇතුළු තිදෙනෙකක්ට මරු කැඳවමින් කුලියාපිටියේ සිදුවූ අනතුර සම්බන්ධයෙන් අත්අඩංගුවට ගත් ටිපර් රථයේ රියදුරා රක්ෂිත බන්ධනාගාරගත කර තිබෙනවා.

ඒ එළඹෙන සැප්තැම්බර් මස 08වනදා දක්වායි.

ඔහුව අද (28) කුලියාපිටිය මහේස්ත්‍රාත් රන්දික ලක්මාල් ජයලත් මහතා හමුවට ඉදිරිපත් කර තිබෙනවා.

එහිදී ඉදිරිපත් වූ කරුණු සලකාබැලීමෙන් අනතුරුව සැකකාර ටිපර් රථ රියදුරා මෙලෙස රක්ෂිත බන්ධනාගාර ගත කිරීමට නියෝග කර තිබෙන බවයි වාර්තා වන්නේ.

අදාළ රියදුරා පැය 24කට අධික කාලයක් නිදිවර්ජිතව රිය ධාවනය කර ඇති බවට අනාවරණය වී ඇති බවද පොලීසිය අධිකරණය හමුවේ සඳහන් කළා.

ඒ අනුව අදාළ ටිපර් රථයේ හිමිකරුට විරුද්ධව ද ඉදිරියේදී අවශ්‍ය නීතිමය ක්‍රියාමාර්ග ගන්නා බව අධිකරණයේදී අනාවරණය වී තිබෙන බවයි වාර්තා වන්නේ.

05. ඉන්දුනීසියාවේදී කොටු වූ අපරාධ කල්ලි සාමාජිකයන්ගේ නම් ලැයිස්තුව එළියට

මෙරට ප්‍රධාන පෙළේ අපරාධ කල්ලි සාමාජිකයන් 05දෙනෙක් සහ කාන්තාවක් ඉන්දුනීසියාවේදී එරට ආරක්ෂක අංශ මඟින් අත්අඩංගුවට ගෙන තිබෙනවා.

පොලීසිය සඳහන් කළේ අත්අඩංගුවට ගත් පිරිස අතරට කෙහෙල්බද්දර පද්මේ, කමාන්ඩෝ සලින්ත, පානදුරේ නිලංග, බැකෝ සමන් සහ තැඹිලි ළහිරු යන අන්වර්ථ නාමයන්ගෙන් හඳුන්වන අපරාධ කල්ලි සාමාජිකයන් සිටින බවයි.

ඊට අමතරව බැකෝ සමන් නමැත්තාගේ බිරිඳ සහ තුන් හැවිරිදි දරුවෙක් ද අත්අඩංගුවට ගත් පිරිස අතර වන බව පොලීසිය වැඩිදුරටත් සඳහන් කළා.

පොලිස් මාධ්‍ය ප්‍රකාශක සහකාර පොලිස් අධිකාරී එෆ්. යූ. වුට්ලර් සඳහන් කළේ අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් සහ ජකර්තා පොලීසිය ඒකාබද්ධව සිදු කළ මෙහෙයුමකදී ඔවුන් අත්අඩංගුවට ගත් බවයි.

(colombotimes.lk)