බණ්ඩාරනායක ජාත්‍යන්තර ගුවන්තොටුපළ වෙත පැමිණෙන ගුවන් මගීන්ට කොළඹ - කටුනායක අධිවේගී මාර්ගය තවදුරටත් භාවිතා කරන ලෙසට උපදෙස් ලබාදී තිබෙනවා. 

ඒ රට පුරා පවතින අයහපත් කාලගුණික තත්ත්වය හේතුවෙන් ගුවන්තොටුපළ ප්‍රවේශ මාර්ග කිහිපයකට ගංවතුර බලපෑම් එල්ල වී තිබෙන බැවින්. 

මීට අමතරව මෙම කාලය තුළ ගුවන්තොටුපළ පරිශ්‍රය තුළ තදබදය අවම කරගැනීම සඳහා අමුත්තන් පර්යන්තයට රැගෙන නොඑන ලෙස ගුවන්තොටුපළ සහ ගුවන් සේවා (පුද්ගලික) සමාගම මගීන්ගෙන් කාරුණිකව ඉල්ලා සිටිනවා. 

ගුවන්තොටුපළ සහ ගුවන් සේවා (පුද්ගලික) සමාගම සඳහන් කළේ අභියෝගාත්මක තත්ත්වයන් මධ්‍යයේ වුවද ගුවන්තොටුපළ මෙහෙයුම් කටයුතු අඛණ්ඩව පවත්වාගෙන යාම සඳහා පැමිණෙන ගුවන් මගීන්ගේ සහයෝගය සහ අවබෝධය අගය කරන බවයි. 

(colombotimes.lk)