LTTE ත්‍රස්ත සංවිධානය හා මෙරට ආරක්ෂක අංශ අතර ගැටුම් පැවති සමයේ විවිධ ප්‍රදේශවල වළදමා තිබූ බිම් බෝම්බ ඉවත් කිරීමේ කටයුතු කඩිනම් කර තිබෙන බව නාගරික සංවර්ධන, ඉදිකිරීම් හා නිවාස අමාත්‍යාංශය පවසනවා. 

එහි අතිරේක ලේකම් එම්. එම් නයිමුදීන් සඳහන් කළේ දශක 2කට අධික කාලයක සිට එම බිම්බෝම්බ ඉවත් කිරීමේ කටයුතු දේශීය හා අන්තර්ජාතික සමාගම්වල ප්‍රධානත්වයෙන් ක්‍රියාත්මක බවයි. 

නමුත් 2018 ඔටාවා ජාත්‍යන්තර ආරක්ෂක සම්මුතියට අනුව කටයුතු කිරීමේ අරමුණින් වසර 10ක් ඇතුළත වළදැමූ බිම් බෝම්බ ඉවත් කිරීමේ සම්මුතියට එවක රජය අත්සන් කර තිබෙනවා. 

ඔටාවා සම්මුතිය රටවල් 164ක එකතුවකින් නිර්මාණය වී තිබෙන බවයි වාර්තා වන්නේ.

මේ වන විට උතුර, නැගෙනහිර හා උතුරු මැද පළාත්වල වර්ග කිලෝමීටර් 1300කට අධික භූමි ප්‍රමාණයක බිම් බෝම්බ ඉවත් කර තිබෙනවා. 

එමෙන්ම තවත් වර්ග කිලෝමීටර් 22.7ක භුමි ප්‍රමාණයක බිම්බෝම්බ ඉවත් කිරීමට ඉතිරිව තිබෙන බවයි වාර්තා වන්නේ.
 
බිම් බෝම්බ ඉවත් කළ භූමි ප්‍රදේශවල මේ වන විට පුද්ගලයන් 980,900ක් පදිංචි කර තිබෙනවා. 

මේ අතර ඉදිරි වර්ෂ කිහිපය සඳහා බිම් බෝම්බ ඉවත් කිරීමේ ඉදිරි සැලසුම ජනාධිපති අනුර කුමාර දිසානායක වෙත ඊයේ (27) බාරදී තිබෙන බවයි වාර්තා වන්නේ. 

(colombotimes.lk)