01. විභාග දෙපාර්තමේන්තුවෙන් විශේෂ දැනුම්දීමක්

අගෝස්තු මස 10වනදා පැවැත්වීමට නියමිත 5 ශ්‍රේණිය ශිෂ්‍යත්ව විභාගයට අදාළ උපකාරක පංති, ප්‍රශ්න පත්‍ර බෙදීම්, සම්මන්ත්‍රණ, දේශන සහ වැඩමුළු අවසන් කළ යුතු දිනය විභාග දෙපාර්තමේන්තුව විසින් නිවේදනය කර තිබෙනවා. 

එම නිවේදනයේ සඳහන් වන්නේ අද (06) මධ්‍යම රාත්‍රියේ සිට එම කටයුතු තහනම් බවයි. 

ශිෂ්‍යත්ව විභාගය අවසන් වනතුරු  විභාගයට අදාළ උපකාරක පංති, ප්‍රශ්න පත්‍ර බෙදීම්, සම්මන්ත්‍රණ, දේශන සහ වැඩමුළු සියල්ල තහනම් බව එම දෙපාර්තමේන්තුව වැඩිදුරටත් සඳහන් කළා. 

05 ශ්‍රේණිය ශිෂ්‍යත්ව විභාගය දිවයින පුරා විභාග මධ්‍යස්ථාන 2,787කදී පැවැත්වීමට කටයුතු සංවිධානය කර ඇති බව එම නිවේදනයේ සඳහන්.



02. COPA සභාපති ඉල්ලා අස්වෙයි

පාර්ලිමේන්තු මන්ත්‍රී අරවින්ද සෙනරත් රජයේ ගිණුම් පිළිබඳ කාරක සභාවේ (COPA) සභාපති ධූරයෙන් ඉල්ලා අස්වන බවට ප්‍රකාශයක් සිදු කර තිබෙනවා.  

ඒ අද (06) පාර්ලිමේන්තුවේදී විශේෂ ප්‍රකාශක් සිදුකරමින්.

ආණ්ඩුව විසින් කෝපා කමිටුවේ සභාපති ධූරය විපක්ෂයට ලබාදීමට එකඟතාවය පළ කර ඇති බැවින් ඒ සඳහා ඉඩ සලසාදීමට තමා මේ තීරණය ගත් බව පාර්ලිමේන්තු මන්ත්‍රී අරවින්ද සෙනරත් කියා සිටියා. 



03. ඉන්දියාවේ ගුවන්තොටුපොළවල ආරක්ෂාව තර කරයි

සැප්තැම්බර් 22වනදා සහ ඔක්තෝබර් 02වනදා යන දිනයන් අතර ඉන්දියාව තුළ ත්‍රස්ත තර්ජනයක් එල්ලවිය හැකි බවට ඉන්දීය බුද්ධි අංශ වෙත තොරතුරු අනාවරණය වී තිබෙනවා. 

විදෙස් මාධ්‍ය වාර්තා කළේ එම තොරතුරු මත සියලු ඉන්දීය ගුවන්තොටුපොළ තුළ ආරක්ෂාව උපරිම ලෙස තර කරන ලෙසට එරට සිවිල් ගුවන් සේවා කාර්යාංශය අදාළ අංශ වෙත උපදෙස් ලබාදී ඇති බවයි. 

සමාජ විරෝධි කණ්ඩායම් හෝ ත්‍රස්තවාදී ක්‍රියාකාරකම් මත මෙම තර්ජනය එල්ල විය හැකි බවද ඉන්දීය බුද්ධි අංශ අනතුරු අඟවා ඇති බව විදෙස් මාධ්‍ය වැඩිදුරටත් සඳහන් කළා.